ЗА ЗАЕДНИЦАТА

КИК БОКС ЦЕНТАР РАБОТНИЧКИ АДОРА

Поддршка на спортот и спортистите

Спортскиот центар Работнички Адора, современо опремен по европските стандарди, е лоциран на ул. Орце Николов бр. 182 А, во првиот станбено-деловен објект на Адора инженеринг во Карпош 2, Скопје. Еден од најдобрите кик бокс центри на Балканот има идеални услови за тренинг, подготовка и обука на професионални кик боксери и за вежбање на аматери – рекреативци, жени и мажи од различни возрасти, под водство и надзор на професионални, обучени и лиценцирани тренери. Тренинг центарот Работнички Адора е отворен во ноември 2018 година во партнерство на Адора инженеринг и Општина Центар-Скопје. Главниот тренер, Димитар Ѓорѓиев, еден од најуспешните и најтрофејни кик боксери во Македонија, неколкукратен светски и европски првак, со над 30 меѓународни пехари и голем број национални медаљи, од 2013 година, континуирано е под покровителство на Адора инженеринг и Фондацијата проф. д-р Ванчо Чифлиганец. Овој проект, како и поддршката на кошаркарите на МЗТ Скопје Аеродром, Карпош-Соколи, други клубови, поединци и спортски манифеставции, е со цел да се помогнат спортот и младите, талентирани луѓе да го развиваат спортскиот дух, за подобар пласман на Македонија на меѓународните натпревари, за продукција на успешни светски спортисти и изградба на спортска нација за поздраво и подобро општество.

НОВ ДОМ ЗА ТРАЈКОВИ НА МЕСТО НА ОПОЖАРЕНАТА КУЌА ВО ДЕДИНО

Хумани проекти за ранливите категории граѓани

Новоизградениот, прв енергетски ефикасен дом А класа во Дедино, општина Конче, Адора инженеринг и Фондацијата проф. д-р Ванчо Чифлиганец го подигнаа и им го подарија на Ивана и Јован Трајкови во мај 2017 година. Новиот, топол дом за возрасните сопружници Трајкови е подигнат на место на старото семејно огниште, врз пепелот на изгорената куќа, која целосно настрада во пожар во декември 2016 година. Погоден од човечката несреќа, проф. д-р Ванчо Чифлиганец решава да им помогне што побрзо да се вратат во својот дом, поттикнат од древната традиција на македонскиот народ за солидарност и подавање рака со помош на луѓето во невоља. За само пет месеци, Ивана и Јован се враќаат во својот опремен, квалитетен и среќен дом, осветен според православните христијански обичаи, со благослов за долг, спокоен, достоинствен пензионерски живот и безгрижна старост. Овој проект е дел од хуманата мисија на Адора инженеринг и Фондацијата проф. д-р Ванчо Чифлиганец за помош на граѓаните и заедницата, како што е санирањето на дотраениот покрив за 100 ученици во Посебното државно училиште Златан Сремец во Скопје, поделените неколку илјади оброци за бездомниците во Скопје, континуирано од 2014 година, повеќекратната помош на настраданите во поплави и пожари, донациите во детските болници, училишта и градинки низ Македонија, хуманитарните пакети за над 200 социјално загрозени случаи во Охрид и Дебрца, поделени ученички и студентски стипендии за талентирани млади луѓе и вработените во Адора инженеринг, поддршка на образовните институции, академии, школи…
За обновувањето на домот на Трајкови во Дедино, Адора инженеринг ја доби 5-тата национална награда за најдобри општествено одговорни практики во категоријата вложување во заедницата, од министерството за економија.

ЕКО ДОМОВИ ЗА ПОЗДРАВО ОПШТЕСТВО

Осум национални награди за заштита на животната средина

Адора инженеринг е пионер во воведувањето и лидер во унапредувањето на енергетски ефикасните домови во Македонија, што компанијата започна да ги гради во 2006 година, уште кога оваа материја не беше законски регулирана кај нас. Компанијата го изгради првиот енергетски ефикасен објект кој во 2014 година го доби првиот издаден сертификат за енергетски карактеристики на згради А-класа во Македонија. Енергетската ефикасност постојано се подобрува и усовршува во секоја новоизградена зграда, од што најголеми придобивки имаат станарите во домовите на Адора инженеринг, преку неколкукратното намалување на сметките и трошоците за електрична енергија за греење и ладење, споредено со претходните згради. Адора инженеринг прва ги воведе во Македонија фотоволтаичните системи, со користењето на обновливите извори на енергија, за осветлување на заедничките делови во објектите и за ноќна илуминација, за што станарите не добиваат посебни сметки за струја. На колективен станбен објект на Адора инженеринг за прв пат во Македонија е поставена паропропусна, воднепропусна органска фасада со иновативни технологии. Со намалувањето на емисијата на CO2 во воздухот и со одличната звучна изолација, далеку над македонските стандарди, Адора инженеринг даде голем придонес во заштитата на животната средина од еко и звучно загадување.
Адора инженеринг има добиено 8 национални награди од министерството за економија за изградба и унапредување на еко домовите, за заштита на животната средина, за заштита од звучното загадување, за изградба на најголемата внатрешна градина за домување во Европа, за придонес во изградба на зелените градови.

ПРАВОСЛАВНА ЦРКВА СВЕТИ ЈОВАН КРСТИТЕЛ

Духовен храм за жителите на Општина Аеродром

Православниот храм Свети Јован Крстител, една од највредните и највпечатливи донации на ктиторот проф. д-р Ванчо Чифлиганец, истоимената фондација и компанијата Адора инженеринг, е во општина Аеродром, Скопје, на брегот на реката Вардар – македонски Јордан, до мостот Близнак и паркот со авион во населбата Ново Лисиче. Црквата започна да се гради во 2012 година, завршена е и осветена на 14 јуни 2014 година од Поглаварот на Македонската православна Црква Охридска Архиепископија, г. г. Стефан, архиереите и свештенството, на голем црковно-народен собир и комплетирана со крстилница во 2018 година. Петкуполната црква е со висина од 15,5 метри, со специфична, препознатлива, древна архитектура, богат живопис во внатрешноста и мозаик со ликот на Свети Јован Крстител во византиски стил над надворешниот влез, изградена според каноните на МПЦ и традициите на македонското културно наследство. Во црковниот комплекс има крстилница, камбанарија, фонтана во облик на крст со водоскоци и хортикултуно уреден парк украсен со многу стар природен камен, тежок 15 тони, донесен од рудникот Бучим со животното мото на ктитирот Чифлиганец: Само делата се вистина како сведоштво за нашето постоење. Храмот е донација за православните верници во општина Аеродром, каде Адора инженеринг има најголеми инвестиции и изградени 20 репрезентативни станбено-деловни објекти, во кои живеат околу 6.000 граѓани. Црквата е препознатлив симбол на овој дел од Скопје и многу посетен духовен објект кој секојдневно живее со илјадници верници и посетители, со нивните молитви, крштевки, венчавки и празници.
Проектот за изградба на духовниот храм Свети Јован Крстител е добитник на националната награда за најдобри општествено одговорни проекти во 2015 година од министерството за економија во категоријата вложување во заедницата.

СПОМЕН ОБЕЛЕЖЈЕ ФАЌАЧ НА КРСТ ЗА ВОДИЦИ

Култен симбол за охриѓани и туристите во центарот на Охрид

Автентичното спомен обележје „Фаќач на крст“, симбол на православните обичаи за празникот на христовото крштевање на „Богојавление“ се наоѓа во строгиот центар на Охрид, кај градското пристаниште, на брегот на Охридското Езеро, каде секој 19 јануари се случува најмасовната прослава на Водици во овој дел на православниот свет. Споменикот кој е синоним на сите фаќачи на чесниот крст, посветен на сите капачи во големиот охридски водосвет на празникот Богојавление, е дар за Охрид, охриѓани, за сите православни верници и гости во најголемиот туристички центар во Македонија, од проф. д-р Ванчо Чифлиганец, кум на манифестацијата Водици Охрид 2012. Спомен обележјето Фаќач на крст е осветено на 5 јули 2014 година и оттогаш тоа е едно од најпосетените места во Охрид, омилено сврталиште на охриѓани, каде се собираат посетителите на балканскиот Ерусалим од сите страни на светот. Идејата на донаторот проф. д-р Ванчо Чифлиганец е на Охрид и на сите граѓани кои ја негувале и ја продолжуваат надалеку познатата древна охридска Богојавленска традиција, да им подари симбол кој ја комплетира приказната за Водици и прерасна во нова атракција. Спомен обележјето е скулптура излеана во бронза, висока три метри, од авторот м-р Ангел Коруновски, академски скулптор од Велес, што го отскликува вадењето на животворниот крст од осветените води на Охридското Езеро на Богојалвение, поставена на постамент изработен од релјефен камен, бел мермер со ранохристијански мотиви и сцени на светиот крст и празникот на Исусовото крштевање.
Споменикот за Водици е еден од најпосетените локалитети во туристичкиот, духовен, историски и културен центар Охрид и е овековечен на илјадници фотографии на охриѓани, домашните и странски туристи.

ФОНТАНА ВО ПАРКОТ КИСЕЛА ВОДА ВО СКОПЈЕ

Урбано пријатно катче за релаксација и одмор на граѓаните

Фонтаната Македонија се наоѓа во паркот во општина Кисела Вода, Скопје, што го краси од 2011 година. Оваа донација на Адора инженеринг во општината каде компанијата има значајни инвестициски проекти уште од 2007 година, го оплемени стариот парк, разубавувајќи го, облагородувајќи и збогатувајќи го овој запуштен простор. Фонтаната искреирана од неколку летечки камења со водопади, потсетува на древната историја, традицијата и цврстиот идентитет на Македонија и македонскиот народ и премрежијата низ времето. Ова симпатично катче декорирано со фонтаната донација од Адора инженеринг за жителите на овој дел на Скопје, прерасна во омилено и доста посетено место за одмор, рекреација и релаксација на граѓаните каде тие си наоѓаат спокој и одмор од стресниот секојдневен урбан живот во македонската метропола.

Општествено одговорниот проект за изградба на фонтаната Македонија во паркот во скопска Кисела Вода е награден како најдобар во категоријата вложување во заедницата од министерството за економија во 2012 година.

СААТ КУЛИ ВО ЃОРЧЕ ПЕТРОВ-СКОПЈЕ И СТРУМИЦА

Урбани симболи кои им го покажуваат времето на граѓаните

Адора инженеринг има подигнато и донирано две впечатливи саат кули, една во општина Ѓорче Петров во Скопје и втората во општина Струмица. Овие општествено корисни проекти се реализирани во средините каде градежната компанија Адора инженеринг има успешно реализирано значајни инвестициски проекти, со изградба на репрезентативни станбено-деловни објекти во препознатлив стил. Идејата на донаторот, проф. д-р Ванчо Чифлиганец, беше жителите на овие општини да добијат саат кули како сведоци на времето, настаните и луѓето, кои со секое отчукување ќе го мерат секој миг и видливи од сегде, ќе го покажуваат точното време за сегашните и за идните генерации.
Саат кулата во Ѓорче Петров, позната како ѓорчепетровски Биг Бен, со висина од 13 метри и уникатен изглед, во близина на станбено-деловниот објект на Адора инженеринг, стана препознатлив симбол кој втисна идентитетски белег во овој дел на Скопје и од 2009 година незапирливо го мери времето како сведок на случувањата во 21 век.
Саат кулата во Струмица, од 2010 година го краси централниот плоштад во строгиот центар на градот во непосредна близина на градскиот парк. Таа е подарок на Адора инженеринг на струмичани кои ѝ ја дадоа довербата избирајќи дом во станбено-деловните објекти кои компанијата ги изгради во близина на градскиот парк. Саат кулата која го збогати ликот на урбаното срце на Струмица и често се гледа на многубројни фотографии и видео инсерти од овој град, е вечен сведок на времето сегашно и времето кое доаѓа.
Саат кулите во скопски Ѓорче Петров и во Струмица се дел од долгорочната стратегија на Адора инженеринг за поддршка на општините со дела за подобар и поквалитетен живот на граѓаните. Овие општествено корисни проекти оценети за најдобри, се добитници на националната награда од министерството за економија во категоријата вложување во заедницата.